يا سامعين أبناء بلد واحده
تحت السما الواحده ويا ما جرى
مرت سنين ع الدنيا متقدره
الغرب سماها العصور الوسيطه
ونظر وقال كان الزمن مظلم
أما الحقيقة البسيطـــه
بتقول في دار الشــرق
مهما جرى ومهما يجرى
من أول تاريخ الهجـره
كان عندي فجر انشــق
نوره في عين الجبارين مؤلم
حتى إذا ما التقوا بالفارس المسلم
عرفوا الحقيقة وعظموا فارس
صلب القوام والدرع تحت العمامه
حتى إذا ما
نزل من السرج ونصب خيمته
سهل الدموع إلا ابتسام الراضي
مايل بجسمه لاستماع الأراضي
وعلى العيدان الطريه
إيديه نديه كيف إيدين الغارس
هذا الذي رد الثغور البهيه
وبنى بأسماء الأئمه المدارس
وحضر مع الخصم لمقام القاضي
وأعاد إلى الأم الصليبيه ابنها
أما عن المنكر نهى
وأما في ليلة شجن بالشام
حلف يمين أفضل له
يفقد ولاده ومؤنسته ولا يهدم
هذا صلاح الدين فتى مقدم
حامل لواء الفتيه والأجناد
فوق الخيول المسرجات الجياد
وهي ليله من ليالي ربيع
أو هي ليله من ليالي جماد
القاهره أولى رايات الجميع
عند المقطم كبرت للجهاد
- يا رب تشفي الصـدور
يا رب توفي الأمهات الندور
يا رب تمنع عن ولادنا الويل
زاحفين على الساحل سلاسل نور
والبحر من دمياط يحيي السيل
واترتبت ع الخطوه رجل الشهور
والصبر أملك من عنان الخيل
حتما على قدام وحتما تدور
والحصن في عكا عظيم الليل
يلقى الأدان بيشق فوق السور
الحق يا ولاد العرب منصور
في كل أرض اتكلمت عربي
الأرض بتتكلم عربي وقول الله
أن الفجر لمن صلاه
ما تطولش معاك الآه
الأرض بتتكلم عربي
الأرض بتتكلم عربي ومن حطين
رد على قدس فلسطيـن
أصلك ميه وأصلك طين
الأرض بتتكلم عربــي
الأرض بتتكلم عربي سبل وكروم
تجري اللقمه على المحــروم
ما تثبتش حصون الــــروم
الأرض بتتكـــلم عربـــي
الأرض بتتكلم عربي يا خيال
يسعد سيفك أم عيــال
ظهرك ياما من الأجيال
الأرض بتتكلم عربــي
الأرض بتتكلم عربي حتى البور
بنت الساقية والطنبـــور
حتى في بطن الأرض قبور
الأرض بتتكلم عربـــي
الأرض بتتكلم عربي بوجد وشوق
الفرع اللي يهم لفــــوق
لاجـل الجـدر يشم الضـوء
الأرض بتتكلم عربـــــي
الأرض بتتكلم عربي جدورها جدود
مـد أتوسـع زي العـــود
أنت البــاكر والمــولـود
الأرض بتتكلم عـــربــي
الأرض بتتكلم عربي ولا ترتاح
واصـل كالسيــل المجتـاح
فتحـك يا عبـد الفتــــاح
الأرض بتتكــلم عــربـي
لما العواطف تكتمل بالعقل
الأرض أطيب من مزاج الحليب
والأرض هي الحاكمه بالعدل
بين ابنها والمستبد الغريب
الجبارين اللي احتموا بالصليب
داسوا على عيسى وكتاب المحبه
عملوا الدمار والقتل والتخريب
والأرض صنعتها الأمل والبشاير
والشمس دواره عليها تشاور
تاخد وتدي في خيال الشاعر
تلقاه عجب في الدنيا هلل وراج
في الشام ومصر تنادت الأبراج
الفتح تم في ليلة المعراج
صلوا على طه الرسول الحبيب
أفتح إيدي لفوق والاقي المجيب
يا قاهره نجومك ملاليه
فيها الهدايه لآخر المعمور
أما ريحك حامله ليه
صوت المرتل في آيات النور:
«نصر من الله وفتح قريب»

—————

فؤاد حداد