انتباه
كتبهاالفيل--النت بتتكلم عربى ، في 30 يناير 2008 الساعة: 08:17 ص
الصراخ يملا النت طلبا للحرية-حرية الراى واطلاق سراح سجناء الراى
واللعنات تصب على ام راس الحكام العرب سالبى الحريات
وتبص كده تقول ياسلام شعوبنا حرة -تطالب بالحرية صحيح
لكن عند اول منعطف- تلاقى المطالبين بالحرية- هم اشد غباوة من الحاكم فى عمق رغبتهم فى كبت الحريات
وانهم يرغبونفى الحرية لانفسهم فقط-
يعنى خلينا ناخذ اشد الامثلة تطرفا
مدونة الملحد ربانى
يعنى واحد ملحد بالذمة هيكتب ايه غير الحاد
السؤال بينط هنا لوحده
ويكتب ليه اصلا
وهل الحريات معناها ان الملحد كمان يتبجح بالحاده
المفروض ان الحرية تعطى للناس الكويسين بس
طيب ياجماعة فيه مليون مدونة اسلامية وعشرة الحادية
لا
طيب فيه مليون مدونة لبنات وسيدات يكتبن ليل نهار عن العشق الشريف فى الفضا ءاللامتناهى والكينونة المتسربلة
وفيه بس مدونة واحدة بتكتب اسرار عاهرة
لا
المفروض ان الحرية تعطى للناس اللى بيكتبوا كلام كويس وحاجات كويسة بس
طيب فيه مليون مدونة لكم ايها العلماء النجباء واللى مليانة علم
هل من حق واحد جاهل زى الفيل يكتب عن جهله
لا
المفروض ان العلماء والنجباء بس اللى يكتبوا
هنا بنكون وصلنا للفاشية
لان الحاكم الفاشى يتبنى نفس المنطق
هو يسمح لاناس بالكتابة والاعلام وناس تانية لا
لانه شايف -من وجهة نظرة ان الناس الوحشين جهلة وملاحدة ومجانيين
وان كتابتهم تؤدى الى تضليل الشباب عن ثوابت الامة
يعنى احنا بنقول-ان الواد الملحد-ده بيهز قناعات الشباب اللى ماعندهمش علم بالدين كفاية
طيب ماتتهز
وبعدين المليون مدونة التانيين يعيدوا تثبيتها
هل نحن من الفزع بحيث اننا عارفين ان مليون مدونة ستفشل مقدما فى تثبيت ماهزتة مدونة ملحدة
نفس منطق الحاكم
عنده محطات تليفزيون واذاعة وعشرات الصحف- وخايف من واد مدون مفعوص
بيقول لك بيثير البلبلة وبينشر معلومات غير صحيحة
طيب عندك مليون وسيلة لنشر الصحيح واغراق المختلف
يقول لك لا ماهو الناس بيصدقوه هو مش انا
طيب والحل
الحل هو المنع
بس المنع اعتراف بالفشل فى المواجهة
مش مهم
كله يهون فلى سبيل الدفاع عن مصالح الوطن العليا والدين والثوابت
المهم ان لاينشر غير الكلام الصح
طيب واذا اختلفنا فى الراى
انا اقول يمين وانت تقول شمال- ماهو لازم حد فينا صح وحد غلط
والنقاش هو الفرصة الوحيدة لمزيد من التدقيق فى بناء وتصحيح المواقف
لا
انا صح وانت غلط
والحل نحذف مدونتك
انت عميل صهيونى
بس كان المفروض نتناقش ونبين وجهتى النظر ونترك الاختيار للقارئ
انت بتستعبط يافيل- خيار ايه اللى نتركه للقارئ
انا اللى صح ومفيش خيار غير اللى انا اقوله
واللى يوافقنى اقوله جزاك الله خيرا-جعله الله فى ميزان حسناتك
واللى يخافنى يبقى صهيونى مندس- يجب بتره
وهنا نصل الى عمق الموضوع
نحن لانثق فى القارئ
ولا نقبل ان يحصل القارئ- المواطن على حرية الاختيار بين بدائل متعددة
لانه جاهل وناقص عقل ودين
واحنا ادرى بمصلحتة
طيب افرض اننا اعطيناه الحرية واختار غلط- يبقى نعمل ايه بقى
احسن نبتر الحاجات الوحشة بمبدا الوقاية خير من العلاج
دى جراثيم والافضل نستاصلها من الاول
ولكن اذا اتفقنا على هذا المبدا
يبقى الاحق قانونا وشرعا اننا نفوض الحاكم الغالب ان يحدد لنا ماهو النافع وماهو الضار
ويبقى مش من حق حد يجعر ليل ونهار ضد الحكام اللى بيكبتوا الحريات وبيعتقلوا الجراثيم
———————————–
مع ان يااخى الشعوب اللى تقدمت قبلنا عرفين اضرار حرية الراى كويس قوى لوعارفين ان اتاحة الفرصة لكل الاراء بيطلع منها تخريف كتير جدا
لكن اكتشفوا ان منفعتها فى الاخر اكتر من ضررها
واخيرا خلونى اخذ خطوة كمان
اصل مرارتى اتفقعت من اللى بيقول الديمقراطيةيعنى الراى والراى الاخر
الديمقراطية فى العمق - ياجماعة مفهوم اجتماعى
يعنى-ان الناس كل الناس- مش بعض الناس-من حقهم
من حقهم يسمعوا موسيقى من الراديو- مش بس القادرين تحضر لمنازلهم فرق الموسيقى
من حقهم يقروا كتاب- بالمطبعة- مش بس القادرين يحصلوا على الكتب المنسوخة باليد
الديمقراطية يعنى اتاحية
يعنى من حقهم ان يشاركوا فى القرار السياسى حتى ولو كانوا جهلة- زى الفيل- ويضغطوا فى سبيل مصالحهم والا يقتصر ذلك على العلماء من الاشراف والنبلاء زى عبد الحفيظ
من حقهم ان يحصلوا على الدواء والرعاية الصحية والفاكسينات التى تقيهم من الامراض
من حقهم ان يختاروا عقيدتهم وان يعبروا عنها
من حقهم ان يعملوا 8 ساعات يوميا ضمن نظام يكفل ان تكفى ال8 ساعات اجرا يراعى انسانيتهم وليس فى نظام يقوم على استثمار الايدى العاملة الرخيصة
الديمقراطية يعنى الاتاحية
وحرية الراى تعنى حرية تمثيل المصالح مش معناها حرية النباح
وفى مجال حرية التمثيل- لو قبلناها-لانفسنا -فضرورى نقبلها للاخرين
لان لو قبلت بحذف ابن الكلب الملحد- سياتى من يستخدم نفس القانون ليطالب بحذفك واستبعادك
يعنى فكرة الحذف والاجتثاث-مش هتنفع
وهى اول الفاشية والخراب
ودفاعك عن مصالحك ووطنك ودينك -سيتطلب منك جهدا لاقناع واجتذاب مزيد من الناس الىماتدافع عنه
يعنى صدقك فى ادعاءك بالدفاع عن الوطن او الدين -هو ادعاء قابل للفحص- ونصدقك لو وجدنا لك جهدا واضحا فى اجتذاب مزيد من القراء- والراى العام- الى وجهة نظرك
فالمخالف لمعتقداتنا هو فرصة جيدة جدا لاعادة فحص وتقوية حجتنا ودفاعاتنا
هنا تنوع الافكار وصراعها ممكن يؤدى الى تعميق وتقوية وتجويد كل الافكار دون الحاجة الى حذف واجتثاث احدها او بعضها
وبكده الكل يستفيد والوطن نفسة بيستفيد
والشعوب اتقدمت من منطلق التنوع والاتاحية-اللى وصلت احيانا لحد الاباحية
ضرر فى مقابل مصالح عظيمة
والمجتمعات بتتوازن عند نقطة -تحددها المنفعة- حتى لو حصل اضطراب فى البداية
عشان كده- لو انت عاوز حريتك- لازم هتقبل بحرية الاخرين
لا ان تحذف وتجتث وتبتر المخالفين
————————
من فضلك اقرا القران كده
هتلاقى ان القران عرض لكافة الاراء المخالفة
حتى الالحاد وحديث الافك
ليه
ـــــــــــــــــــــــــــــــــــــــــــــــــــــــــ
التصنيفات : افكار مستوردة | السمات:افكار مستوردة
أرسل الإدراج | دوّن الإدراج
يناير 30th, 2008 at 30 يناير 2008 11:16 ص
أنت كده بتفتح على نفسك المزيد من شبابيك الريح،
أنا قرأت بعضا من مدونة الملحد الذي أشرت إليه،،
أولا: هم لو سكتوا عنه، لما سمع به أحد.
ثانيا: هو كلامه لطيف جدا، (مضحك) من الجهل الشديد..
ثالثا: هو لم يستخدم (في ما قرأت) ألفظا خارجه..
وهو ده المثال الذي يصح فيه ما قاله الفيل قديما،
إكتب 500 مدونة ترد عليه..
وأزيد عليك
“وتكشف جهله، وتصحح خطأه ”
أما دعوة الإغلاق، فبكرة حاتتقفل كل مدوناتنا واحد ورا التاني عند أول خلاف..
ويفضل لأصحاب الاتحادات يصببحوا ويمسوا على بعض كل يوم..
تحياتي
يناير 31st, 2008 at 31 يناير 2008 9:12 م
اذا قرأت فقط ما يعجبك وتركت مالا يعجبك….فلن تتعلم ابدا…هذا رأيي