وسية-السيد حجاب
كتبهاالفيل--النت بتتكلم عربى ، في 21 ديسمبر 2007 الساعة: 20:02 م
مين اللى قال الدنيا دى وسية
فيها عبيد ملك إيد و فيها السيد
سوانا رب الناس سواسية
لا حد فينا يزيد و لا يخس إيد
جينا الحياة زى النبات أبرياء
لا رضعنا كدب و لا اتفطمنا برياء
طب ليه رمانا السيف على الزيف
و كيف نواجهه غير بالصدق و الكبرياء
عيش يا إبن آدم بكر زى الشجر
موت و إنت واقف زيه فى مطرحك
و لا تنحنى لمخلوق بشر أو حجر
و شب فوق مهما الزمان جرّحك
مين اللى قال الدنيا دى وسية
فيها عبيد ملك إيد و فيها السيد
سوانا رب الناس سواسية
لا حد فينا يزيد و لا يخس إيد
و كل ضيقة و بعدها وسعة
و أهى دى الحقيقة بس منسية
و كلنا ولا تسعة و بنسعى
و دى موش وسية.. الناس سواسية
لملم جروحك يا حزين و إمشى
خطوة كمان و تخف آلامك
و إحلم بعين صاحية و لا تنامشى
غير لما تقطف زهر أحلامك
ـــــــــــــــــــــــــــــــــــــــــــــــــــــــــ
التصنيفات : حواديت ..كده---حواديت مش كده-قصص | السمات:حواديت ..كده---حواديت مش كده-قصص
أرسل الإدراج | دوّن الإدراج
