مجاريح-رشدى-ابنودى
كتبهاالفيل--النت بتتكلم عربى ، في 12 ديسمبر 2007 الساعة: 21:12 م
مجاريح
هنقول ونعيد ع المجاريح .. يابا
دمع وتباريح .. والله وغلابة
كان لي غزال .. والغزال له سنة سلطاني
وشرخة العين كدة !
والضحكة آه ياني !
كان لما يدخل عليّ
يدخل معاه الضي
وبيده ياخد إيدي ّ
أفتح له أحضاني
وف ليلة راح الغزال
حير ف عيني السؤال
أصاحب الموال .. وأنده مع المجاريح
أنده وأقول .. آه
والله وغلابة اللي راحوا واترموا ف الهوا
لا فيهم طب ولا دوا .. يابا
ع المجاريح
***
أيام ما كان لي حمام .. بيعشق الغية
ما كنتش أشبع كلام .. ولا ملاغية
أيامها كنت أبتسم .. كان لي هوى وغية
وكنت أحب الهوى .. والشمس والمية
وف ليلة طار ( هج ) الحمام
سابني ف عز المنام
قبل ما أرد السلام .. كان راح ف قلب الريح
سابني أقول .. آه
والله وغلابة اللي راحوا واترموا ف الهوا
لا فيهم طب ولا دوا .. يابا
ع المجاريح
***
آه يا زمان .. كانت حبيبتي وردة م الجنة
لو جبتها يا زمان .. لاغني غنوة تتغني
ده ياما حبينا .. وقولنا وحكينا
ومشينا وايدينا .. دفيانة ف ايدينا
وازاي ؟
ازاي ده هيهون عليه ؟
طب أقول وأحلف بإيه ؟
إن الحبيب بكرة جاي
رايق ووشه مليح
يقولي لأ .. سيبك من قولت آه
والله وغلابة اللي راحوا واترموا ف الهوا
لا فيهم طب ولا دوا .. يابا
ع المجاريح
ـــــــــــــــــــــــــــــــــــــــــــــــــــــــــ
التصنيفات : شرقاوى, هو لسه ماصفرش-خايف مانسمعش | السمات:هو لسه ماصفرش-خايف مانسمعش, شرقاوى
أرسل الإدراج | دوّن الإدراج
