انا عارف ان كلامى مش هيعجبكوا  مش مهم- المهم انه يعجب اللى مفروض يعجبهم هما- فاذا لم يعجبكم- ولم يعجبهم كمان تبقى دى المشكلة- فمن فضلكم خلونى اركز وبلاش مقاطعة…..اصل فيه ناس كتير عاملين نفسهم معارضة ويقول لك ازاى الرئيس يورث الحكم لابنه- دا ما يصحش-  واحب اقول انه مفيش وراثة ولا حاجة اولا لان النظام الجمهورى بتاعنا لايمكن توريث مقعد الرئاسة فية وانما هو ينتقل عن طريق الايلولة يعنى نصيب- وماحدش يعترض ع القسمة والنصيب الا اذا كان بقى علمانى فاسق والعياذ بالله وكى ادلل على ما سبق دعونا ناخذ لمحة او لطشة تاريخية كده عشان نختبر نظرية النصيب دى ف محمد نجيب اولا كانت قسمته انه راجل طيب وهليهلى وعلى باب الله والظاهر ان ذلك لم يكن يعجب الضباط الشبان وقتها فقالوله معلهش ياكابتن بعد اذنك احنا عاوزين البتاعة دى وهنا يلعب النصيب الدور الاساسى فى صراع السلطة  والحقيقة مش صراع ولا حاجة لن محدش اتعور يعنى نفس اللى حصل يوم ثورة 23 يوليو يعنى تقريبا الملك فاروق قالهم خدوها انا مش عاوزهاوبرضة الحكاية كانت متسهلة ومحدش اتعور  كل ده حصل والناس ده بيديها لده  واحنا طبعا مالناش دعوة ليه لان كل شئ نصيب والانسان مهما عمل لايمكن يتحدى النصيب المهم ان ناصر اخد البتاعة وبالتاى اخد الشعب معاها وف وكسة سبعة وستين الراجل يعنى احس بشوية احراج-شوية-فقال ياجماعة انا ماشى وهااعطى البتاعة المنيله دى لاخى وصديقى زكريا فمن ناحية زكريا قالة لا مش عاوزها ياجمال والراجل يعنى راعى الصداقى و ما حبش يستغل الظروف الملحوسة ويقوله طب هات وكانت مره نادرة خرج الناس ليقولوا قولتهم لا ياجمال ودى كانت من المرات النادرة اللى قال فيها حد لا ياجمال  الشعب قال تمشى ايه انت بتسطعبط انت مش لسه واخد البتاعة دى من كام سنة بس وطلعت على مقاسك ورحت دهولتها وو وكستها انت والولاد اصحابك وبعدين جاى تستعبط وتسيبها لنا مخروبه و المهم الراجل قول ايه قول اتكسف فخد البتاعة تانىلغاية ما مات وكان كثير التفكير قبل ما يموت يديها لمين بعد كده لمين لمين وكان محتار وربما كان اكتر واحد مناسب هو زكريا برضه لكن الشعب قال قبل كدة ف الوكسة -لا زكريا لا وكان- ده من قبيل العنديعنى مش قصده كده الشعب - طيب زكريا بالذات لا- شوف النصيب  المهم ناس كتير كان نفسهم ياخدوا البتاعة دى ف ناصر حب يؤدبهم وحط السادات وهو الوحيد فيهم اللى مش مناسب ليضمن تلاشى الاطماع وكان قصده يعنى يهزاهم بس واخونا الشعب كان فاهم كده لان الاغانى الشعبية وقتها كانت بتقول جاب لك اية عبد الناصر لاا مات -جاب لك ….من المنوفيه اسمه….. - وباين حطه نائب رئيس ونسى يشيله او مالحقش يا حبة عينى ومات على اساس ايلولة البتاعة للسادات  وحصل بين السادات وزملاءه شبطه كده صغيره لا دى بتاعتى لا دى بتاعتك -سيب البتاعه -لا مااسيبشى لا دا جمال ادهالى لا دانت بتسطعبط المهممن هنا لهناالخلاصة ان ماحدش اتعور وشدها السادات واخدها يامعلم  وتمر الايام وييجى السادات عاوز يعين نائب يختاره يكون بعيد عن اى شبهة طموح سياسى يعنى قالهم شوفوا لى حد يكون مضمون ميه ف المية فاختار النائب مبارك يعنى  اختار واحد بحيث بل يمكن ان يكون بديلا له والناس تقول ده ايه اللى جايبه ده مش معقول فيقول لهم مالقيتش غبر كده المهم السادات اتعور وما ت وقال للنائب ما تنساش تاخد البتاعة ما تسيبهاش كده مرمية ع الرض الناس تدوس عليها وده نصيب برضه ولان النائب  ما اتعورش فقام النائب من على المنصة من وسط الاموات واخذ البتاعة دى وفضلت معاه 25 سنة وكل ماحد يقوله ياريس عاوزين نائب عشان البتاعة يقول انا دورت مش لاقى- 25 سنة بيدور ف 70 مليون راس لا مؤاخذة مش لاقى فبعد كل ده يعنى لو الرئيس هيستامن حد بذمتك يستامن واحد صاحبه مثلا  وهو حد يدى امان لحد فى الزمن ده غير العبيط ام من الاحوط اذا كان عندك امانة فالاولى انك تستامن عليها ابنك اللى انت مربيه وعارف اخلاقه كويس   بالذمة-ذمة مش ده منطق سليم ولا حد مش معاه قصدى مش معايا___طيب اقرا كده الحلقة الثانيه