اكتب مقالات زى مانت عاوز من الحلاج -لاينشتاين ومن عمر الخيام لكريشنا مورتى -براحتك لكن مصيرك ترجع للواقع بتاعنا

-نرجع بقى للواقع

-ولامؤاخذة

معلهش

 نصيبنا كده

 ربنا عاوز كده

-ونكمل كلامنا حول اسطورة جمال مبارك اللى احنا خلقناها وصدقناها 

فكثيرا ما قال بعض المعارضين من اين جاء جمال مبارك وكيف قفزهكذا بالباراشوت على قمة الحزب وصار الامر الناهى فيه

والحقيقه ان جمال لم يات من الفراغ 

 وان لم يات جمال لتخيلناه- فنحن فى حاجة الى هكذا اساطير لمخلوقات ديتاصورية ندعى انها هبطت علينا واستولت غصبا على حقوقنا لنخفى تخاذلنا وتفريطنا المذهل فى هذة الحقوق

 وجمال لم يجئ من الهواء بل جاء من الاسطورة-نعم الاسطورة التى صنعها المصريون منذ الثمانينيات حول علاء وجمال مبارك

 ففى ذلك الوقت لم يكن للمصريين حديث الا عن شركات وفلوس علاء مبارك الذى استحوذ على البلد وكوش على كل حاجة وعن ان اخوه جمال غلبان مالوش فى الكلام ده اما علاءفهو كالعفريت ينط ف كل حاجة حتى حلة الشوربة قبل ما الحاجةالوالده تقسم كيلو اللحمة تلاقيه غطس فيها من غير لا احم ولا دستور واكل اللحمة وساب البصل-اصله ما بيحبش البصل -سعادتك

- وهو المالك لكل الشركات او شريك فيها واذكر ان كل شركه تعمل اعلانات غزيرة ف التليفزيون - يبقى دى اصلها بتاعة علاء -اصل علاءشريك فيها اصل علاء قال لصاحب الشركة ياتخلينى شريك لااخرب بيتك

 من الفراخ للحديد للسيارات للفول والطعمية وكانت كل شركة تخرب يقولون اصل علاء اختلف معاهم -زى الشيخ الشريب وقويرى الشمعدان وغيرها

كل ده وجمال فين -الناس تقولك -لا جمال ده غلبان غير اخوه خالص واول ذكر جاء لجمال فى اواخر التسعينات فى اسطورة وجيه اباظه الشهيرة عن ان شخصية مهمة جدا جدا كلمت وجيه اباظة فى التليفون وقال له -علاء وجمال يبقوا شركاءك ف التوكيل والشركه فسال بامارة ايه فقال له اهم زى اولادك يا اخى هممممم 

 قال الراوى فالراجل حط السماعة وشرب سيجارة ومات ومتهيا لى انه مات م السيجارة مش من المكالمة

وتيجى بعدكده قصص كثيرة عن الممثلة شريهان و عن ابو الفتوح ودينا عشان ياخدوا منه التوكيل ثم يتضح فى القصص ان ولاد السادات هم اللى نطوا ع التوكيل مش جمال وهكذا استمرت الاساطير لربع قرن والمصريون يلوكونها بهبل وعبط منقطع النظير

 -فنحن من صنع الاسطورة لدرجة واقسم بانك لو فايت جنب مطعم جديد او سوبر ماركت او حتة ارض فضاء لقال لك سائق التاكسى اوالميكروباص -دى بتاعة علاء يابية

 -مين اللى بيه؟-

 وفجاءة وفى عز معمعة عصر وزهوة عمرو خالد قيل ان علاء مبارك قد تم اخفاؤة من الساحة لانه اهتدى من سماع شرايط عمرو خالد وان زوجته اتحجبت وده سر اختفاؤهم من الساحة ونال علاء مبارك رضا اغلب المصريين واعتبرت اسطورته توته توته ولو جاء ذكره لقال لك الناس دى شركة علاء ربنا يبارك له - جزاك الله خيرا يا اخى

واقتصرت الاشاعات حول جمال وفى كل ظهور للاخوين فى ماتشات كورة او مع الفرق القومية او ماتشات كده حبشتكه وديه ييلعبان فيها الكورة بالترنج والجزمة الكاوشت

تجد علاء غلبان  وعلامات ونور الصلاح كده على وشه-ربنا ينصرك يابنى- واخوه جمال هو اللى بيشد الميكروفون ويتكلم فى الفاضية والمليانه ويقول اى كلام فارغ والناس كانت بتفوت -برضه الواد لسه صغير وطايش مصيره يكبر ويعقل كده زى اخوه طبعا لان علاء طيب واخوه هو الى شقى

 وشوية شويةوجلا جلا  قلع جمال الجزمة الكاوشت  ولبس بدلة وكرافتة ولقيناه بيتكلم فى السياسة وماسك البلد بيد من حديد

الناس قعدت تالف الحكايات عن جبروت جمال وهيمنته على كل شئ فى البلد تماما كما كانوا يؤلفون الاساطير عن احتلال علاء لكل انواع السياسة التجارة والصناعة وكافة شئ وصولا الى سوزان تميم

واصبحت حكايات الكراهية ضد جمال مبارك هى الهواية الوطنية

الاكيد ان جمال مبارك بتوصل له هذة الحكايات واعتقد انه بيتساءل - هو الناس دول بيكرهونى ليه بالشكل ده؟

مع ان الحل بسيط جدا مش عارف ازاى يتوه عن جهابذة مستشارينه وخدامه

الحل ان زوجة جمال ترتدى الحجاب وتظهر فى حلقتين مع عمرو خالد

ساعتها الناس كلها هتقول ربنا يبارك لك يابنى والتوريث يبقى شرعى

ويتضح ان المشكلة مش ف جمال ولا علاء

المشكلة فى البطانة اللى حواليهم

ولا ادرى كيف تغيب

او ان يتم اخفاؤه من الساحة ونرتاح ونختلق اسطورة جديدة