ابو خالد مات

خالد  دكتور زميلنا ورحنا نعزيه فى البيت

خالد انسان جد جدا لايعرف الهزار ولا الضحك- ربنا خلقه غلس

كنا شباب وكان اذا حد فى الشلة قال نكته فظيعة  وضحكنا لما تعبنا كان خالد يسالنا بجدية شديدة يعنى ايه المقصود من النكتة دى فيثور الضحك باقوى  مما كان

خالد بغلاستة كان مهم قوى فى شلتنا اللى فشتها عايمة

كان خالد على خلاف دائم مع ابوه لانه بيشرب الخمر وكانت مشاكلهم لاتنتهى

الاب القدوة هو اللى بيشرب مش خالد وكان خالد قد محور حياته كلها على رفض هذا الامر ورفض ابوه وكل تصرفاته وكان الدنيا مفيهاش شئ تانى يفكر فيه

رفض الابن لبعض افكار الاب وتصرفاته شئ من سنة لحياة والا لما تطورت الدنيا -لكن مش كده

خالد لا يفكر الا فى هذا الامر

وفى يوم الوفاة - الجيران خبطوا ع الباب وقالوا ياخالد الحق ابوك تحت البيت فى السيارة لازم تعبان- قصدهم سكران

نزل خالد ليجد الاب كالعادة نايم على مقود السيارة والكلاكس شغال على طول

لم يستغرق الامر طويلا ليعرف خالد  ان ابوه مات ومش نايم من تاثير الخمر

شالوه وكانت الزجاجة لاتزال فى يده

حاول خالد ان ينزع الزجاجة فلم يستطع -يد الميت  تخشبت ومكلبشه عليها بقوة رهيبة  

—————————-

رحنا العزاء كواجب ثقيل يبعث على الاكتئاب

فى احدى غرف المنزل يجلس الرجال وتتعالى نهنهات النساء من الغرفة المجاورة

جلسنا وصوت القران من الكاسيت ملعلع- الشيخ عبد الباسط -واستمعنا فى خشوع 

وعادة عندما ينتهى الربع- يتكلم المصريون

لكن احنا -كشلة بلاوى-استمرينا فى خشوع وحزن مصطنع

تعالى البكاء الخافت من غرفة الحريم ويظهر ان خالد حب يشغلنا عن المتابعة فقال فجاءة

لقد استدعونى تحت العمارة فوجدته مكلبشا فى زجاجة الخمر

لم نكن نعرف حتى تلك اللحظة وفوجئنا فبهت الجميع-لكننا اثرنا الصمت صمت من نوع ماذا اقول- فقسوة خالد وراءها جرح كبير والم عظيم فنحن كنا نعرف ماذا يعنى ها التناقض المرير بين شخصية خالد وشخصية ابوه - استطرد خالد بصوت ممرور- زمانه دلوقت بيتحاسب

صار الامر فوق احتمالنا ومع ذلك خرسنا-وفجاءة انبعث صوت ضحكة مكتومةمن احدنا وكانها صوت شخير مكتوم حين انفلتت الضحكة من انفه لطول ماكتم انفاسة

فانطلق الجميع يقهقهون بشكل هيستيرى

وتعالى صوت البكاء من غرفة النساء

فزاد الضحك اكثر

وانسحب ياسر زميلنا من لسانه وقال يتحاسب ايه ياخالد وهو داخل عليهم بقزازته كده

وانفجر الضحك بجنون من المفارقة

وازاى المغسل والقائمين على الدفن لم ينزعوها من يده انتو بتستعبطوا

ودا يحاسبوا فيه ايه ده دا جايلهم ماسك القزازة ولا فارقة معاه

دا محدش هيكلمة دا هيدخل على جهنم من نفسه بقزازته-هيقولهم هاى— هى جهنم من فين ياشباب

وسقط من سقط على الارض من الضحك

تفلتنا واحد ورا التانى من العزاء تشيعنا اللعنات من غرفة النساء

——————-

مرت سنيين وبعدها كانت اجتماعتنا لاتخلوا من مناقشة موضوع اساسى

ازاى نساعد خالد فى التوقف عن شرب الخمر ليل ونهار