دعوه للانضمام للحزب الوطنى  ونصلحة م الداخل- واصصصصصلح الكراسى

———————————

اللى بيدعو الى تجريب المتجرب -حقه-
وكانه شئ جديد الحزب الوطنى ده
انحيازات الحزب معروفه
وتجربته واضحة
الحزب لايمثل مصالحى ولن يمثلها وهو يمثل مصالح الراغبين فى حته من الكعكة-على حساب ملايين المواطنيين
هل انضم اليه لانى مش لاقى غيره ياس ده والا انتحار ولا استرخاص والا قلة حيلة
هل يتدنى بى الذكاء ان انضم للحزب الوطنى فى نهاية مرحلة هى ذروة فشله
الفكرة الفظيعة بتاعة استجلاب عدة مليونرات ليتحولوا الى ملياديرات بتسهيلات الدولة ومواردها ليكونوا قاطرة التنمية بان كل واحد فيهم يشغل 10 -30 الف عامل فى شعب يصل تعداده الى 75 مليون- مين يصدق ان عبث كهذاا يحدث تنمية ونقول للشعب ارتاح انت احنا هنعمل تنمية - وبعدين نقول له اصلك مش حاسس بالتنمية
جمال عبد الناصر حاول بالعكس وقال ارتاحوا انا والاتحاد الاشتراكى هنعمل تنمية
مفيش تنمية بدون الناس
مفيش حاجة اسمها ارتاحوا انتو- بطالة 40 فى المائة- وانا هاعمل التنمية
المشروع كله فاشل من اوله ازاى انضم له وهو بينهار
و اصبح فيها كلمة عضو الحزب الوطنى وكانها شتيمة
عدم توافر البديل مين مسئول عنه
وعدم توافر البديل شئ مؤقت قائم على قرار الحزب بمنع الناس من حرية انشاء احزاب حقيقية تمثل مصالحهم-وبناء عليه نقول عدم توافر البديل يؤكد ان الاحزاب ميته بمافيها الوطنى ومسدودة وليست مجالا لاى فكر ولا حركة دى احزاب انشاها الحزب الوطنى
-انك ميت وانهم ميتون
فالوطنى اكثر حياة فى موته لانه يحوى كبار الموظفين والممولين والامن
وهم موجودين لمصالحهم وليس لمصالح الاخرين
طيب نفترض جدلا ان قرر عفاريتى صدر-صدر بان الحزب الوطنى جماعة محظورة ويقبض على اعضاءها ويفصلون من وظائفهم او يمنع تعيينهم زى الاخوان- كام واحد سيبقى فى الحزب متمسكا بافكاره ومبادئه
بلاش
نفترض ان الرئيس مبارك اصدر قرارا باستقالته من رئاسة الحزب وانه سينشا حزب المستقبل مع جمال مبارك وكبار موظفى الدولة ورجال الاعمال-كم عضو سيبقى فى الحزب الوطنى ويتمسك بارائه ومبادئه
والذ حاجة قالها الاخ الزميل هى حكاية تدافع الشرفاء فى طابور تقديم الاوراق لانتخابات المحليات وبسبب اخطاء تقنية بسيطة لم تؤخذ اوراق الشرفاء
ياخ احمد دا شغل حلق حوش وشغل حلمبوحة
اصلاح ايه دى مصالح وشغل ملاعيب شيحة
عاوزنى ابقى عضو فى الحزب واقول زى اللى بيطلعوا ف التليفزيون -طيب برضه فيه اعضاء فى الحزب لم تؤخذ اوراقهم لان الطابور كان طويل
وفى غرق العبارة اقول كلام فارغ
وف حريق مجلس الشورى الحمد لله ان المستندات ماتحرقتش
وف حرق المسرح القومى -الحمد لله ان القبه ما وقعتش
احنا فى نهاية مرحلة ياعزيزى تمثلت بالتدنى الشديد وانكشاف العورات
يعنى مع تصاعد الغضب والقرف الشعبى من سياسات ومخازى الحزب–واصبح اعضاء الحزب ينكرون عضويتهم امام الناس-نروح ننضم للحزب
بدعوى ان فيه عمل سياسى متاح سنقوم به
هو ده المتاح لان نقوم به فى الحزب
شغل حلمبوحة وحلق حوش وان المواطنين الكلاب مش حاسسين بانجازات الحزب
واللذيذ هو فكرة اننا ندخل الحزب ونضحك عليهم ونصلحه من وراهم وهم هيسيبوه لنا ويتنازلوا عن مصالحهم واساليبهم وهيمنهم الامنية
ياعزيزى مفيش حاجة اسمها الحزب الوطنى - دا مجلس موظفى الدولة العديمى الكفاءة والعمد والاعيان والامن وهم هم من ايام الاتحاد الاشتراكى -مفيش حزب-الا ماتبقى من الاتحاد الاشتراكى والحركة بداخلة حركة موظفين فيما عدا تجاذب المصالح بين اصحاب النفوذ ومراكز القوى وقد اضيف للاتحاد الاشتراكى جمال مبارك
وايدولوجيتهم السياسية والاقتصادية -ستالينية
ستالينية علينا وفخفخينا لهم فقط
ياراجل دا الحد الادنى للاجور فى مصر لايكفى ذبابة لكى تعيش- عاوزنى اتبنى انجازات الحزب
ياراجل دا لاجى غزة بياخد 300 دولار من الانروا شهريا كاعانة وجندى الشرطة فى العراق بياخد 500 دولار شهريا ومصر وصلت لنكسة اعنف من المحاصرين فى غزة والمنكوبين بالدمار والخراب ف العراق
عيب ياراجل
مصر محاصرة والشعب منكوب وانا اروح اطلع لهم لسانى وانظم لمسبب النكبة
بعد تدمير السويس فى 1967 كان المهجرين مستورين عن وضع المواطن حاليا
عيب ياراجل
وتقول لى اضحك عليهم واخد الحزب وهم نايمين واصلحة
المواطن لاينتمى الا لمصالحه ومن يتبناها
وان كان اليوم دا ممنوع وممنوع انشاء احزاب حقيقية- فده لايبرر ان نتبنى النكبة
دى نهاية مرحلة
وصدقنى انا متاكد انه هيكون عندنا احزاب حقيقية فى المستقبل القريب-لكن بعد ان ندفع ثمن استرداد وتبنى مصالحنا المستلبة - ذلك الاسترداد الذى يصمم الحزب ان يجعل ثمنه باهظاا على الجميع