التدوين يعكس شئ من تفكيرنا-يعكس طريقة تفكيرنا وانماطه الشائعة- ولكنه ليس عينة محايدة يمكنك ان تتعرف فيها على  محتويات-التفكير العربى الى هو اوسع بكتير مما هو موجود فى المدونات وبيتحرك بسرعة شديدة نحو افاق بعيدة
والتدوين فى مكتوب خصوصا له طابع مميز اولا انه مقتصر على طبقة الافندية وهى طبقة محدودة الافق ظلمها التعليم ظلم شديد فحدود ما يعترفون به هو فى حدود كتاب المدرسة والذى لايحوى باطلا واى كلام خارجة هو باطل وخارج المنهج المدرسى ويجب ان يحذف اى سؤال فى اى امتحان ياتى من خارج المنهج
كتير من المدونيين جاءوا لمكتوب عشان بحلم غامض ان يبقوا كتاب مشهورين او على الاقل ان ينبسطوا بكونهم اصبحوا كتاب اذا كان مش ممكن يبقوا مطربين او وزراء او كهدف اخير ان لم ينفع ذلك فعلى الاقل ان يستمتعوا باشادة المعلقين بهم ويحظون براحة مورفين القبول الاجتماعى الزائف وربما ان ياخدوا ثواب كمان على مايكتبون
من هنا يتحدد المحتوى اللى بيكتبوه باهدافهم الغامضة والغير واقعية ولانهم لم يكن لديهم-غالبا- اختيارا ا لما سيكتبونه قبل ان يفعلوا لذلك فهم يكتبون تكرارا لماهو شائع وما هو مكرر  وقد اصبح من الضرورى ان يكون المدون ملاكا لايخطئ ابدا وكل حياته كانت طهورا فهو لايكتب لنا ابدا عن اخطاءه وفشله وهزائمة واحباطاته بل يكتب دائما عما هو مفروض ان يكون فى خطة جماعيةافتراضية او  وهمية-برتوكولات حكماء مكتوب- خطة وهمية صيغت فى مكان ما-و ليس هنالك احد مطالب بتنفيذها او حتى مناقشتها- بل هى اعفاء لنا جميعا لحين ان ياتى المعتصم  او اوباما لتحقيقها واحنا كل اللى علينا ان نكرر البرتوكولات ملايين المرات ونشتم كل من يكتبون خارجها او يناقشونها فالاوهام لاتحتمل المناقشة
———————————–

كلامنا كله  مسوجر من عينة

اتى الربيع الطلق يختال ضاحكا

او ان النسوان البيضا زى الفراخ البيضا تموع النفس وشوربتها ماتمريش 

الوحدة العربية-الحكام العرب وحشيين- - لاننا ابتعدنا عن ديننا- ناس معندهمش اخلاق واحنا عندنا-الغرب المنحل- سقوط امريكا-حماس اخر حلاوة والباقيين جواسيس -حكومة حراميةوظلمتنا خالص-حقوق الانسان لى انا واصحابى- حرية الراى لمن يتفق معى فى الراىغير كده تبقى قلة ادب-كل مختلف فهو عميل اكيد لازم يدعو للشذوذ الجنسى

ومن ناحية تانية هتلاقى مدونات الحب والهيام ودى تتلخص فى ان حبيبى نايم ومطرمخ فى الافق الالزوردى وحتى دول تجد ان الاصطناع واضح جدا فيما يكتبون
———————————-

الغريب ان كلمات زى- التغيير- واللى كانت لاتخلوا منها مقالة فى مكتوب اختفت تقريبا واكتفينا بتجيير عصا السرعة -الفتيس- على الوضع - اجترار

كل الشروط السابقة لو صحت- بنسبة -تدفع المدونيين ان يكتبوا مايحقق لهم  اشباع نسبى لاهداف غير موضوعية كتلك- لا ان يكتبوا ما يفكرون فيه حقا حتى ولو كان خطا او هبلا او تجريبا

المدون لايجرب المدون يكتب المضمون والمتجرب 
المدون لايكتب بصفته الفردية لكنه يكتب ضمن خطة تعبوية افتراضية ليحظى بالقبول المضمون والانبساط وتعليقات الموافقة كتصحيح ابلة المدرسة للكراسات- احسنت يابطل زائد نجمة- التى تتوالى لتعطى انطباعا للقارئ بان الكل موافقون على المقال وان الكلام ده صحيح والقارئ العربى يسهل اغوائه واقناعة بحيل كتلك وهو ما يحقق وهم
1- اننا اتفقنا -اغلبية-وانبسطنا
2-  كده كويس واحنا كويسين
3-انى انا كاتب حلو

4-  مفيش احسن من كده وعملنا اللى علينا

5- انتصرنا والحمد لله

ولان النجاح يقاس بفعالية الشغل فى تحقيق المستهدف منه فلاشك ان علينا ان نعترف بان التدوين العربى فى مكتوب  هو ناجح ويحقق اهدافه اللى حددها لنفسه

وكونك تصدق انك حققت اهدافك ونجحت- دى اول خطوات الخراب- واللى مش مصدقنى راجع فعاليات مؤتمر الحزب الوطنى الاخير