بعد ما خلصنا البحث فى الخلفية التاريخية لنظام الحكم فى مصر وتوصلنا الى نظرية واحدة تنتظم التاريخ المصرى  كله وهى انه كل شئ نصيب وان انتقال الحكم من فلان لعلان لترتان هى مسالة لا تخرج عن الصدفة  البحتة -ولعل من الافضل ان نسمى هذة النظرية نظرية( الاستيلاد الاستلابى) لان الرئيس يستولد نفسه حسب- ما بيطق ف نافوخ سيادته- ساعة ما بيعمى القدر وانه مفيش سبب فعلا لاختيار فلان لانه احسن للوظيفة دى من علان وان محدش شاغل باله اصلا ولاحد ولامؤسسة مهمتها المفاضلة والغربلة بين من يصلحون وانما هو النصيب والنظرية اذا هى نظرية الاستيلاد الاستلابى الاعمى والاستلاب هنا نعتبره استلابا لمصالح الناس سيبك من اختيار الناس لان ده شئ مش مطروح اصلا و ف كل مرة جاء رئيس جديد اندهش الناس -وده ينفع ده وده يقدر يعنى يسد- وبعد سنوات يتضح جدا انه رئيس شاطر ولهلوبه وملهم وكده وانه- والله احسن من اللى قبله

وانجازاته انقح من انجازات اللى قبله

يعنى الصدفة البحتة اللى خلت عبد الناصر يضع السادات نائبا له لمجرد اغاظة زملاءة من المرشحين على اساس انه اقلهم كفاءة-وجاء القدر ليثبت انه العود من حزمة

لكن والغريب انه كل مرة بيجاوب الرئيس بابهار على السؤال بتاعنا وهو ده يعرف يسد يعنى؟ -وفعلا بيسد- بيسد سدد  جامد قوى وكل مرة تاتى سنوات طالت او قصرت يصبح الرئيس فيها مقبولا شعبيا ثم يلى ذلك السنوات الاخيرة لكل رئيس حيث يزهق المصريون منه ويبقوا مش طايقيينه -خربها ابن ال

…. فى حالة جمال مبارك- حدث خطا توقيتى بسبب احتراق لجنة السياسات الجديدة التى يراسها واعتبارها سبب كل البلاوى-وهذا نموذج جديد لاول مرة عندنا- ربما يغنى الشعب عن التساؤل المبدئى-وهو ده ينفع -يسد يعنى؟

ومن المقدمات الظاهرة لغاية دلوقتى وبانصاف- واضح جدا انه ينفع ويسد

 والانتقال من مرحلة الرضا الى مرحلة الزهق مرتبط طبعا بفشل الرؤساء-الدوله- فى تحقيق اى تحسن ف الحالة المعيشية للمواطن-عادى- على اساس ان الرئيس قال لنا  استنوا انا هاحلها وما يحلهاش ولا حاجة فى ظل كل ما سبق يصبح احتمال تولى جمال مبارك الحكم امرا منطقيا اكثر من اى مره حدث فيها انتقالا لمقعد الرئاسة فى مصر فهو بعون الله سيكرر ببساطة نفس الدورة السابقة وهنتكلم تانى عن المرحلة الجديدة وضرورات المرحلة والناس تقول وده ينفع-لان صورته وبروفيله توحى فعلا انه ما ينفعش وتوحى انه ما ينفعش فعلا غير موظف فى بنك استثمارى تم تعيينه بالواسطة وممكن يمسك ف العلاقات العامة او ادارة تحسين جودة الهيولى البنكية هناك ايضا مشكلة لكنتة الخنفة شوية هو دايما بيتكلم كده كانه مكسوف او خايف من حد او ان حد ماسك  عليه زلة مثلا وعيونه زائغة ولاتوحى باى عمق ولا بجاحة و لا صياعة واحد متمرمط  على اساس انه ملهم ولا حاجة يعنى باختصار كده- برضه الراجل ما لفش ولا اشتغل فى الحكومة مثلا ولا اتوظف ولا ركب ميكروباص  وتنح على الكرسى بعد ما زق الناس ليركب-فالناس لها حق تتسائل عن قدرته على ان يركب كرسى الحكم ويستقر عليه

 يعنى م الاخر شكله ما ينفعش لا الرئيس الخالد ولا القائد ولا نسر الجو ولا الرئيس المؤمن ولا هو مناضل قاد الثورة مع زملائة مثلا  ولا قتل رشاد عثمان ولا قاد الضربة الاولى وركب صواريخ على طيارات التدريب ولا  كانه واحد على وشك ان ينام ولذلك يبدوا الكلام الذى يقوله مش لايق عليه وانه فية مفارقة وتباعد بين الكلام وقائله كل هذه عوائق تحول دون القبول المبدئى له عند المصريين والذين يحسون تجاهة بريبه شديده ادت الى ان تنتشر ضده شائعات غير معقولة تتناول ميولة الجنسية وهذه الشائعة يطلقها المصريون عادة ضد من لا يرتاحون اليهم بفراستهم ولا تعنى انهم يصدقونها فعلا 

 ولكن هذا كله لن يحول واقعيا فى حالة توليه للرئاسة-نظرا لان مفيش غيره- ولن يمنعه ذلك من ان يمر سريعا اوبطيئا -حسب ظروفة- بمرحلة عدم القبول ثم القبول المؤقت الى مرحلة الزهق منه

وحتى لو المراحل اتلخبطت شوية والمرة دى بدانا م الاخر- جيب من الاخر- فاعتقد انه فى حالة تعيين جمال او غيره كرئيس للبلد- فانه من الممكن ان يعود الاستاذ صفوت الشريف وزيرا للاعلام مع ممدوح الليثى رئيسا للتليفزيون- وده هيكون كفيل باعدة رسم الصورة وتظبيط المراحل بما فى ذلك اعلان اننا دخلنا فى مرحلة جديدة

لانه بصراحة -فى ظل الوزير الحالى الناس هتفتكر انه نفس المرحلة ومش مرحلة جديدة

وهنا بتيجى المشكلة

واثناء ذلك الناس اهى بتدفع التمن