الرئيس القذافى زعل من العرب -اللى رفضوا دعواته للوحدة الفورية فقال خلاص طظ فيهم انا هاتعاون مع افريقيا باتحاد فورى

واهو زعل من الافارقة ومش عارفين هيروح فين وايه الدعوة الجاية- هل سيدعونا مثلا للاتحاد مع الجن الازرق

التعاون العربى فشل لاسباب موضوعية
لكن هى هى نفس الاسباب اللى تفشل اى تعاون افريقى-او حتى مع السحالى
التحول من مستحيل لمستحيل- هو رغبة بان يكون لدى الزعيم اى حلم مفارق للواقع يبشر به-ليعفى نفسه من مسئولياته المباشرة
ان يجعل من بلده- دوله مؤسسات -محترمة- زى مخاليق ربنا- ويتعاون مع شعبه اولا -قبل الصراخ للتعاون والوحدة مع الجيران
هو ده السبب الحقيقى لفشل التعاون العربى والافريقى
انه مفيش دول اصلا- بالمعنى المؤسساتى- عشان تتعاون
ويعنى لو رئيس دوله عربية مش عارف يتفق مع شعبه على تناوب الرئاسة بين سياسيين مختلفين-او احزاب مختلفه- كل 6- 12 سنة- بامارة ايه عاوز يتعاون مع الجيران
يعنى لو رئيس عربى مش عارف يتعاون مع شعبه لتنمية البلد-كمؤسسات ومحاكم مستقله وجامعات لها قيمة وبرلمان له شرف و   و -بامارة ايه عاوز يصدر افكاره للاخرين

حكاية عاملة زى ان الحاكم الفلانى رفض التدخل الاجنبى وقال لا لامريكا

ياعزيزى- الحاكم ده بقاله 30 سنة فى الحكم ولم يعمل على تحصين بلده ضد التدخل الاجنبى ببرلمان محترم وقضاء مستقل  وجامعات و اتفاق اجتماعى وعدالة تحصن البلد ضد التدخل الاجنبى

بالعكس الحاكم عمل كل ماهو عكس ذلك-وخرب كل مؤسسات المجتمع ودمر نسيج المجتمع بحيث شارف على الانهيار ولم تجد طوائفه حلا لمشاكلها الا رفع السلاح فى وجه الدولة

وبعدين يقول لك انا ارفض التدخل الاجنبى

ماهى المسالة مش بالكلام