الدكتور رياض الدرامللى-التانى-استذ كرسى ورئيس قسم القباحة النوعية-اعلن منذ فترة انه هيفتح مدونة -عقبال ولادكوا- لان عنده رسالة هو مرسل لتوصيلها الى الناس ليخرجهم من الظلمات اللى النور

قلنا كويس- اهو ارحم من المهدى المنتظر

بدا الدكتور رياض طقوس التبشير برسالته بشتم كل الناس فى وقت واحد بافحش واقذر ما ظهر فى مكتوب من شتائم وبذائه وسب فى الاعراض ولغوصه فى الاديان

قلنا برضة اى مهدى منتظر وله رسالة لازم تكون له معجزات برضه تجمع الناس حواليه-وعنده حق- لان الرسالة تبشر بالعصر الجديد والفكر الجديد بدلا من الجاهلية اللى احنا عايشين فيها

وتمادى رياض- ابو رسالة- فى شتائمه وقذارة ضميره ولسانه-حتى ظننا -لجهلنا ان هى دى رسالته-وان صياغة الرسالة بهذة البلاغة واللغة انما هى من قبيل تطابق الشكل مع المضمون-يعنى الراجل بيعكس ضميره فى مدونته كنوع من التبشير بعصر جديد- هو كده

والله انا عن نفسى خدعت وظننت ان هى دى رسالته-ان ينشر الشتائم والوساخة الى اقصى درجة ممكنة-يعنى بنظام الفن للفن ذاته

الى ان تكرم اخيرا وتلى علينا المتن الاصلى لرسالته التى انما ارسل ليبشرنا بها

الان نفهم ان كل ممارسات رياض ماكانت الا تمهيدا نفسيا وعاطفيا ووجدانيا لكى نتلقى رسالته بعد ذلك بنفس راضية مطمئنة

دا متن رسالته اللى بشرنا بيها امس فى مدونته

نقلا حرفيا من مدونته وعلى مسئوليته

———————————————- 

 اعتقد فعلا ان السيد جمال مبارك اختيار صائب و موفق و عنده من الصلاحية و الخبرة ما يؤهله لتولى المنصب .(يقصد رئاسة الدولة)..انت و معظم الناس بس معترضين لمجرد انه ابن الريس ….مش هاتقبلوه مهما يكون …..
و انا سبق سألت مين يا ترى فى رأى السادة المدونين اصلح واحد يتولى المهمة ….طبعا مفيش رد ….لأن مفيش حد ….دى الحقيقة

 انا أرى انه لاتقدم ولاأمل لمصر اللى بالاستقرار السياسي لذا فأنا من أشد مؤيدى فكرة التوريث لهذه المره فقط لأن ظروفنا والقيادات السياسية الحاليه ( حكومة او معارضه ) ليس بينها من هو بفكر ومؤهلات جمال مبارك …

———

مشكلتكم انكم مش عايزين تشوفوا اى حاجة كويسة ….كأنه عيب لو قلنا للحكومة صح …او برافو ….ياخى دى حتى حاجة تسد النفس ….كتر الجحود ده صعب قوى ….

و بدل ما يشكروا الحكومة عشان مبادرة (حاسب لكل بيت ) استخدموه فى الهجوم عليها …و اثبات جديد لحقيقة ان فيه ناس حرام فيها الخير …و حرام فيها الحرية ….و حرام فيها اللقمة كمان

.منعا لمزيد من انتشار الجهل بين قراء المدونات و إذا كان هناك لوم فعلى يمكن توجيهه للحكومة … فإننا نلومها بالتأكيد على السماح للنظام التعليمى بأن يفرز هذه الشراذم الوضيعة

….و ليه ماتكونش جهات معادية مثلا هى اللى جندت كل المدونين دول عشان يهاجموا البلد ؟؟؟

انا شايف ان الحكومة اختارت اختيارات ممتازة للسلع اللى تحاول عن طريقها توجد بعض المنافذ لتدبير الاعتمادات الكافية للعلاوة الضخمة الجديدة ………
يعنى المواطن محدود الدخل فعلا …. مش هايفرق معاه كتير زيادة اسعار الوقود ….الا مثلا اذا تبعها زيادة فى اجرة الميكروباسات و الاتوبيسات و ده ممكن .

..سكان العشوائيات دول مشكلة مزمنة فى دول كتير …. و بعضهم بيفضل يسكن فيها عشان يبقى بعيد عن العيون لاسباب متنوعة

—————————————————————————————————الفيل——–

هو ده الفكر الجديد-وهى دى الرسالة اللى لازم تصاحبها القباحة والتهديدات حسب علم القباحة اللى متخصص فيه د رياض اللمبى

وطبعا رياض له كامل الحق فى ان يرشح من يشاء لرياسة الجمهورية-او رفع الاسعار للبنزين او غيره-كرسالة يبشر بها الناس

لكن لا اعتقد ان اى مرشح يحب ان يقدم للناس من خلال شخص  لسانه وضميره قد اشتهرا بالنجاسة

اتخيل لو جمال مبارك- عرف بحاجة زى كده-هيكون مكسوف جدا

ولو سمع مافى السطور مدونة رياض من وساخة ونجاسة-لقال ياارض انشقى وابلعينى

وحتى رياض ذكر فى مقاله رفع اسعار البنزين

وانا بصراحة سمعت اشاعة ماشية فى البلد ان -البنزين اتكلم مع رياض بكل هدوء

لو سمحت يارياض ماتجيبش سيرتى ولا اسمى على لسانك ولا فى مدونتك-عشان بس سممعتى -لان النجاسة اللى فى كلامك تنجس بلد ياراجل

فرد عليه رياض

بنزين- اسمك بنزين- ده اسم مستعار وضد الدين وانا ممكن اسكت لاساءة لنفسى لكن دينى لا -انا لا ابدا ابدا بالاساءة لحد-ثم انت مين ايها الجاهل الوضيع -دا انت تتشرف ان مثلى يذكر اسمك- يابن ال……. وال….. وامك….. و

———————————————————————————————–

واليوم- وفى الصفحة التالية لدعوته الى جمال مبارك- ينشر رياض فى الصفحة التالية مباشرة على مدونته مقالا نجسا يسب بعض المدونات النساء فى اعراضهن ويتهمهن بالكفر ويهددهن ويبتزهن

طيب انا من معارضى سياسات جمال مبارك ولكنى ادعو مخلصا الى ان يحذف رياض اسم جمال مبارك من مدونته-خصوصا وانه دائم الايحاء بان له اتصالات و  و

بلاش دى 

بس يكف عن مسح وساخاته بالاسلام وبمصر

وساخاتك انت تتحملها وحدك 

ارجو من القراء القادرين على الاحتمال ان يطالعوا المقال فى مدونته

ياجماعة ناصر الهاكر- بجد مش مشكله تجاة نجاسة  وارهاب مبدا- البقاء للاوسخ فى المدونات

والزملاء اللى بيقولوا ننسحب من مكتوب- سامحونى بيهربوا فى منتصف المواجهة

 اصل يعنى مش مصادفة-ولا يمكن مصادفة- ان مدونتى السيدتين اللى بيهاجمهم رياض بكل قذارة- تعرضتا الى تدمير ناصر الهاكر لهما

الخلاصة ربما يبدو الان واضحا لماذا يريد البعض اسكات صوت المدونيين فى ان يكتبوا ضمائرهم بكل الاساليب القذرة

عشان كده عيب حد يقول ننسحب