كل مدون تقريبا-عنده خيال بعيد-انه فى يوم من الايام يبقى الكاتب الكبير المشهور

قول عليه حلم- قول خيال قول تهيؤات

يعنى انه فى يوم من الايام هييجى الفارس ابو حصان ابيض ليخطف كلماتهم من المدونة المحدودة الى عالم الشهرة والى علالى سلم المجد

ممكن انت تنكر وانا انكر

لكن دا العفريت اللى بيحرك اغلب المدونيين

ومن هنا بتييجى اهمية التعليقات اللى من نوع- ما اروع كلماتك ايها الكاتب الذى ولد عملاقا-انت ما حصلتش ومفيش منك اتنين

فهذة التعليقات ماهى الا تصبيرة- وبشارة على الطريق

وكتير من المدونيين بيقولوا -ان الجرايد بتسرق كتاباتهم

وبتلاقى المدون بيصرخ ياناسسسس انا اتسرقت

لدرجة ان احدهم اكد انه بيسجل اشعاره فى الشهر العقارى قبل نشرها وكانها تركيبة دوا مضاد حيوى جديد

وكتير بيصرخوا عن ضرورة حماية الملكية الفكرية-وعن الجواهر اللى بتتسرق ليل نهار

و لدرجة ان زميل قال انه مش بينشر الاشعار اللى بيخاف من سرقتها وبيكتفى بنشر الحاجات اللى مش غالية قوى-كعينة فى الفاترينة

ويتعدى الامر -العفريت- ذلك الى ان يسيطر العفريت على محنتوى الكتابة نفسها

ومن المنطلق ده بيكتبوا- او بتنبع كلماتهم بروح مشروع الكاتب الكبير

يعنى هو يكتب ما يجب على كاتب كبير ان يكتبه ولانه سيحاسبه النقاد فى المستقبل على ما كان يكتبه ايام ماكان مجرد مدون عادى وقبل ما يشتهر

وطبعا الحلم مشروع وكل واحد حر فى حلمه

وليس الغرض ان نسفه من احلام الناس

لكن ان ينسى المدون ان الاصل فى التدوين هو ان يتاح المجال للناس العاديين -ملح الارض- ان يعبروا عن انفسهم

يعنى ان المدون هو انسان عادى بكل اخطاؤه اللغوية والفكرية وتناقضاته المشاعرية والملوخية

وانه مش مطلوب منه الاستعراض- الاستربتيزى -امام احد -لانه ببساطه- ياعزيزى المدون-انت مواطن عادى -لا عبقرى ولا المنفلوطى ولا فيكتور هوجو ولا هيفاء وهبى

وكونك تتصور انك جوهرة -سقطت سهوا وقدرا بين الالف من المدونيين العاديين- صدقنى دا مش هيوصلنا لاى مكان

ومش معنى ان مقالة من عندى او عندك اتنشرت فى جريدة -انه خلاص-

ومش معنى ان حد اهبل اقتبس او لطش حته- من كلامك -انه ياسلام

وسائل الاعلام اتسعت ومحتاجة حشو كتير

لف على المدونات هتلاقى ان نسبة التشابة فيما هو مكتوب تتعدى الخمسين فى المائة

يعنى لاتعايرنى ولا اعايرك الهم طايلنى وطايلك

احنا بقينا زى القنوات الفضائية-كله يشبه بعضه

ونسبة المبتكر اصبح محدودا  جدا ومختنقا  وسط ركام التكرار

يعنى الموضوع — يظهر فى احد المدونات ثم يستولد بسرعة فائقة فى باقى المدونات

ناهيك عن الموضوع الازلى بتاع- حبيبى هل تظن ان من السهل ان انساك

وموضوع -وتنسكب المعانى فوق تخوم الذكريات -وينفشخ الافق الاذوردى

وموضوع الكينونة المتسربله فى الشيكولاتة

وموضوع -جائنى تعليق وقح من مجهول جاهل كافر-وربنا لاقفل المدونة

وموضوع اتحادات المدونيين واللقاءات فى بلكونة التدوين-وتناولنا العشاء

ان وصلنا اخيرا الىان يدعى احد الزملاء  ان المخابرات اعطت ملفاتها الى الزميل-لينقش منها- وهو يدعى ان ما ينشره لم يسبق لجنى او انسى ان يعرفه الا  لحظة كتابة هذة السطور- بيقول كده والملفات تحت باطه

————————————————–

والخلاصة اننا -فى حاجة للبحث عن مخرج لما ادعى انه مازق التدوين

المازق اللى وقعنا فيه مبكرا

يعنى كتبنا موضوعاتنا -وشتمنا امريكا وقلنا ياحبيبى وبحلقنا فى الافق اللازوردى وفعصنا فى ام الكينونة-وقلنا اللللى وكتبنا ميتين ام تعليقات ومجاملات- لا تخطر على بال الشيطان نفسه

طب وبعدين

تفليسة والا ايه ياجماعة

مش ده اللى بيشغل معظمنا وماحدش بيتكلم عنه

مش ده اللى خلى ناس كتير تسيب مدوناتها وتطفش

السر اللى كلنا عارفينه

احنا كده- اسرارنا كلها مكشوفه -وانت فاهم وانا فاهم لكن لا احد يجرو ان يقول